|
KRY WEER GESAG OOR JOU KINDERS  Voel jy asof jy gesag oor jou kinders verloor het en dit nie kan terugkry nie? Dis nie te laat nie – jy kan jou gesag herwin en jou kinders op 'n gesonde manier dissiplineer. Gesonde gesag bestaan uit verskeie boustene: Onvoorwaardelike liefde 'n Belangrike vraag om te vra: “Hoe kan ek my kind beter liefhê?” Dit moet ons eerste doel wees. Ons moet glo in die krag van liefde om nie net ’n kind daarmee te kan toevou nie maar om werklik ’n kind daarmee te kan vorm. Ons moet liefde ook nooit as ’n teenpool van dissipline of gesag sien nie. Hou by dit wat jy gesê het Ons het die reg om aksie te verwag wanneer ons praat. Hierdie reg word weggegooi wanneer ons drie en vier maal praat, al harder praat en bang is om te praat as ons weet ons kind gaan sleg op ons woorde reageer. As ’n kind egter leer dat ons net een keer kalm en ordentlik praat en dan optree, geniet ons die voordeel van ware seggenskap. Aanspreeklikheid Een sinoniem vir aanspreeklikheid is verantwoordelikheid, en albei woorde verklap waaroor hierdie aspek van gesag handel. Ons kan geen gesag uitoefen sonder om te aanvaar dat die Here die reg het om ons daaroor aan te spreek of van ons ’n antwoord oor ons ouerskap te eis nie. In ons ouerskap is ons onder die gesag van God. Die reg om grense vas te stel Ouers verwaarloos hierdie aspek van gesag wanneer hulle net op kinders se stoutigheid en ongehoorsaamheid reageer. Ons leer nie ons kinders vooraf waar die grense is nie en wanneer hulle dan in ons oë die grense oorsteek, straf ons hulle. Dis nogal onregverdig, nie waar nie? Ons weet tog die meeste kinders word nie met ’n goed ontwikkelde aanvoeling vir grense gebore nie! Die vermoë om vreugde en sekuriteit te gee Ons as ouers het die mag om ons gesin veilig te laat voel en ons huise met vreugde te vul. Dit is die Here se bedoeling dat die gesin ’n kind se hawe moet wees. Wanneer die kind tuis gelukkig en geborge voel, word dit soveel makliker om die ouers se gesag te aanvaar. Erkenning van die bevelsorde As ons teen die regering uitvaar, in plaas daarvan om vir hulle te bid, of as ons die sondes uit ons dominee se verlede met smaak oorvertel, doen ons verkeerd. Ons leer ons kinders om gesagsfigure net te respekteer wanneer hulle doen waarvan ons hou. Voor ons weet, spoel die minagting vir gesag ook in ons eie huis in, en met al ons kritiek teen ander, sal ons self nie kritiek vryspring wanneer ons nie na ons kinders se pype dans nie. Regspraak en regverdigheid Hou op om van alles ’n grys area te maak deur nie vir jou kinders reg en verkeerd te leer onderskei nie. ’n Gewete ontwikkel met tyd en deurdat ons geleer word wat aanvaarbaar en onaanvaarbaar is. Dis onnodig om in sewe sinne aan ’n kleuter te verduidelik waarom ’n mens nie jou pa mag spoeg of jou ma se hare mag trek nie. Dis verkeerd. Eenvoudig. Invloed en inspirasie Ouers het ongelooflik baie mag om hulle kinders se lewens vir altyd te beïnvloed – baie meer as wat ons besef. Die positiewe invloed is onskatbaar en dit is die deel van ons Godgegewe “mag” wat ons moet leer uitbou as ons die soort gesag wil hê wat die Here vir ons wil gee. Intussen moet ons die vermoë om dit vernietigend teen ons kinders te gebruik in onsself raaksien en beveg. Nederigheid Wat ouerskap betref, is nederigheid 'n voorwaarde vir gesag. Ons kinders is eerste daar om te sien wanneer ons fouteer! Hulle het dus ook die reg om eerste te hoor dat ons jammer is.
|
