 Die Res van die Wêreld is Engels...! - Maree de Wet Toe ek begin het om die internet in Afrikaans te ondersoek, was ek aangenaam verras om te sien hoeveel Afrikaanse webwerwe oor die afgelope paar jaar ontstaan het - jy kan omtrent enigiets van a - z soek en dit te vinde kry. En Google het 'n fantastiese poging aangewend en jy kan nou "google" in Afrikaans na hartelus! 'n Ruk terug het ek begin om my eie webwerf te ontwerp en gevind daar is duisende sjablone (of profielvorms) te vinde om elke smaak te pas - van kleurvol tot eenvoudig en eenkleurig, van wild met swart en rooi tot bestendig en kalmerend, van eenvoudig tot ingewikkeld. Maak nie saak wat jou keuse is nie, jy begin dan en skep al jou 'spyskaarte', sit al jou artikels en prentjies in, speel rond met al die verskillende modules, komponente en 'mambots', en siedaar! jy het 'n pragtige webwerf waar jy al jou produkte kan adverteer en verkoop of sommer maar net gesels ... Maar dan kom die tyd vir jou werf om gepubliseer te word - en jy besef die res van die wêreld is Engels...! Waar jou (Afrikaanse) kliënt moet kliek om te bestel, sê dit, "click here to order"; wanneer jou (Afrikaanse) kliënt wil betaal, sê dit "your cart contains ... items" en al die betalingsinstruksies is ook in Engels! Die "Soek" fasiliteit sê ook "search", maar dit kan 'n mens gelukkig verander - maar 'n webskakel bly 'n "Web Link" al maak jy wat en die Sindikaat bly hardkoppig sê "Subscribe to this feed". Natuurlik hang dit af van watter tipe sjabloon jy kies en ek is seker daar is baie Afrikaanse sjabloon-ontwerpers êrens daar buite, maar ek dink hulle is ook maar beperk tot wat in die "Engelse" wêreld beskikbaar is. Ek weet Engelse beskrywings word wyd aanvaar as die norm op die internet, maar as daar enigiemand daar buite is wat my Joomla!-sjabloon se 'warmpos' (hotmail) kan redigeer in Afrikaans sodat AL my inligting in Afrikaans is, sal dit wonderbaarlik wees!
|
